上周五港股反覆上落，恒指跌129點，收報20,199點。表面上，當日港股看似平平無奇，但期指約在上午11點半，曾經由20,285點急插至20,103點，短短約兩分鐘內就跌咗182點。由於事出太突然，部分揸貨的投資者連忙追沽，令現貨指數一度跌落兩萬點邊緣先搵到支持，好友們慘吃驚風散。
咁究竟發生咩事呢？原來聽聞話，由於外電喺當時報道，中銀監計劃要求將銀行交叉持有的次級債從附屬資本中全額扣除，間接限制了銀行的貸款能力。有心人就借有關消息作「東風」，即刻狠沽2,000張期指，造成驚心動魄的一幕。之不過，其實單料喺幾日前已有聽聞，反映係有人想渾水摸魚企圖隊個市落嚟，唔排除有人可能會發動第二輪攻擊，大家現階段真係要步步為營。
（小尾）