邏輯上無可能用負秒數或零秒跑完100米，但理論上完成嘅時間可愈來愈短，短到一秒、十分一秒甚至億萬分之一秒，總之唔會係零秒。保特再破100米及200米賽跑世界紀錄，世人似乎心服口服，無話佢靠對跑鞋，唔似早排世界游泳賽搞出禁穿「鯊魚泳衣」嘅爭論。

諗計提升能力更實際

好多人都想自己參與個遊戲嘅規則夠公平，即係追求公平競爭。我講過好多次，喺唔同遊戲規則下，就有唔同嘅贏家和輸家，無論規則點改，總會對部分人特別有利。喺想方法削弱對手優勢及提升自己能力之間，唔知你會揀邊樣。

天生跑得快或努力練習，人哋會輸得心服口服，但係點解靠對靚跑鞋，或者有件靚泳衣贏比賽，人哋就唔順氣呢？你會話器材可以用錢買番嚟，唔係自己能力。吓？點解用錢買嘢唔算付出呀？都要想方法賺錢先買到器材㗎！

成日有人話大戶喺股市佔盡優勢，散戶只有被魚肉，所以要加強監管或改法例。好似早排美國有議員要求禁止「高頻交易」及「快閃交易」，因為對散戶唔公平。其實投資銀行放喺開發「高頻交易」及「快閃交易」嘅資源真係超出你想像，呢啲優勢都係需要有付出先有收穫。

可能又會有人話我偏幫大行，我反而記住「獅子銀行」鄭大班曾經對一班學生講嘅一番話，內容大致係：「港大畢業生搵工係咪有優勢？當然有。咁咪好唔公平？世界係唔公平㗎，所以你哋要爭氣囉！」

（大健）