滬綜指近2700見支持

股神巴菲特喺上星期寫咗篇《美鈔效應》（The Greenback Effect），大家都將注意力放喺「美鈔排放」（Greenback Emissions），其實文章開首兩次提到「蝴蝶效應」。六十年代初，美國氣象學家Edward Lorenz發現咗非常微細嘅差異，可以造成十分巨大嘅影響，佢曾經提出一隻蝴蝶喺巴西拍翼，會喺美國德州引起龍捲風嘅說法。

依家美國財經傳媒、專欄作者對A股到實，據世界交易所聯盟（WFE）截至今年六月資料，紐交所、納斯達克兩個市場市值合共12.5萬億美元，上海只有2.3萬億美元（深圳入唔到全球十大）。A股以前對美股微不足道，但依家中國經濟出一點小亂子，全球股市可能出現大動盪。

滬綜指上周一度跌至2,761點，逼近重大支持位2,700點（以黃金比率0.236計）後反彈，全周跌2.9%；恒指全周雖然跌3.3%，但未曾見深度調整，距離支持位18,800點（以黃金比率0.382計）仍遠。

中移（00941）回A消息還未鬧得熱烘烘前，Baby個妹喺81蚊入咗貨，最初一心短炒，之後股價好快升穿90蚊，唔捨得放，無幾耐跌番落嚟，又驚，於是喺84蚊放咗，依家佢又諗住入市嘞！

30%人最睇好建行業績

呢兩個星期係內銀股業績期，網民最睇好邊一隻內銀股嘅業績呢？據《東方產經》網上民意調查截至上周末晚上6時數據，最被網民睇好嘅3隻股票係建行（00939）、工行（01398）及中行（03988），分別有30.5%、28.9%及18.4%網民支持。

最近睇民企之父、瑞銀中國投資銀行部副主管張化橋個Blog，佢最新一篇文章叫《股民和基民的悲哀》，推介咗Vanguard基金創辦人John Bogle嘅兩本書《The Little Book of Common Sense Investing》（關於投資常識的小書）和《Enough》（夠了），佢話：「Bogle說，你們瞎折騰甚麼呢？每天忙忙碌碌，買賣頻繁，只是幫了券商的忙，肥了稅務局……為甚麼100次股災也不足以教會股民呢……過去的3、5年不能代表未來的3、5年，統計學上的『回歸平均數』（Reversion to the mean）讓你不敢得意……」

捕捉時機係蠢人遊戲？

張化橋認為，股民和「基民」（基金散戶）作為一個群體，本身就係大市，點能夠跑贏自己？試圖搵最佳入市時間，係蠢人嘅遊戲。Bogle建議買指數基金，永不沽出。

上星期Baby同一班大學生去見太古（中國）主席陳南祿，大家傾到廉價航空問題，陳南祿話機票愈賣愈平，幾十年前嘅票價肯定比依家貴，以前乘客會着西裝搭飛機，相當隆重。

Baby於是落「好旺角」摷舊雜誌，搵到本喺一九七八年賣一蚊嘅八卦雜誌，裏面有唔少旅行社廣告，其中菲律賓碧瑤夏連娜7天豪華團團費係1,250蚊，日本本州富士山7天就3,090蚊，當年港人嘅人工又有幾多？咁啱雜誌登咗兩則黛安芬及香港皇家警察嘅招聘廣告，女工日薪40蚊（未計勤工獎60蚊等），一個月返足工就有900幾蚊，當年警員月薪係1,445至1,590蚊，即係一個普通打工仔要儲起碼一個月糧先去到轉菲律賓，去日本就要儲兩至三個月糧。當年有得租彩色電視機，月費65蚊！

（Baby）

若然有料想報畀Baby或有嘢問，可電郵money.biz@opg.com.hk