上證狂挫兩成後，終於搵到支持反彈，市場仍非常擔心北水明寬實緊，咁又係，過去四個月如果唔係內地狂放水，A股及港股又點會如斯瘋狂。不過，古晨覺得，中央過去幾個月，足足掟咗幾萬億先令市場恢復番信心，無理由一下子就畀個市散落去，相信大市升勢只係無早前咁誇張，但不致於潰不成軍。
上周市況，正正可作一面照妖鏡，是龍是蛇一目了然。近期炒味極濃嘅結好控股（00064），自透露澳門名店倉嘅大計細節，上周市況咁差，結好已見跌唔落，上周四果然發力炒上，周五再見有成30球特別上板，唔排除係有基金要貨，看來名店倉個計劃各界都幾睇好，以走勢計，睇怕唔見一蚊雞都唔肯收貨，止蝕位可放於0.75元。
古晨