本文重點
最近新股熱烘烘，就連「四叔」都再出嚟講話會抽新股，睇嚟新股熱仲有得玩。近日外電報道，話厚樸基金同淡馬錫都有投資嘅內地礦業公司龍銘，計劃喺第四季來港上市，集資額仲高達10億美元添，絲絲淨係聽到方風雷領導嘅厚樸以及淡馬錫做股東，都已經覺得有睇頭。
胡潤榜搞錯係李小龍
尋日再睇到內地媒體嘅一篇報道，話龍銘嘅老闆李曉明原來喺《2008胡潤礦業富豪榜》排名第5，身家最少50億，同唔少內地富豪一樣，報道形容李曉明非常低調，究竟佢低調成點呢？
就係低調到連胡潤榜嘅人都會將佢個名搞錯成「李小龍」，根據胡潤榜研究院一位調研員話，由於李曉明極其神秘同低調，即使佢哋嘅人進一步調研，佢哋都只係話龍銘老闆極可能係「李曉明」。
不過，厚樸高層已經向外證實，龍銘嘅實際老闆的而且確係李曉明，而唔係李小龍，絲絲最想知嘅係，咁多名唔揀，點解胡潤榜會將李曉明搞錯為李小龍呢？
余絲韻