本文重點
近期熱爆嘅新股金隅（02009）喺尋日終於截止招股，勢成今年新股嘅凍資王，今次金隅招股之所以咁旺場，全因為銀行大力放水，以超平息谷行孖展，所以幾乎有少少銀行存款嘅人，都話要走去借孖展抽新股。
券行按規定披露
尋日滙富集團（00188）就公布話，借咗一筆5,800萬元貸款畀一名叫做曾譚廣嘅客戶，用嚟認購將於港交所（00388）上市嘅股票。貸款並無抵押，並每年按2.15厘計息，有關借款將於本月二十八日償還。今個月除咗金隅招股外，都無其他新股招股，睇嚟呢名客戶都係借錢嚟抽金隅。
有投資者借五千幾萬抽新股絕對唔出奇，聽聞金隅「頂頭槌」（即公開招股部分認購股數最高者）入飛者就起碼有二百幾人，但證券公司要披露借款人嘅資料，好似個名咁就比較特別，始終涉及私隱。
不過原來《上市規則》係規定，如公司向一家實體提供貸款超過公司最近期經審核綜合總資產之8%，就需要作出披露。
所以各位大客如果唔想自己個名公諸天下，可能要搵間總資產值更大嘅公司借錢喇！
余絲韻