本文重點
尋日內地網站登咗段關於中糧集團董事長寧高寧被停職嘅報道，話寧總已接到上級調令，佢將被停職兼要「外出學習」，但集團職務同待遇暫時唔會改變，不過就唔畀佢再參與集團事務，仲話正式文件會喺呢幾日下發，依家件事仲未有向內部通報咁話。
循法律手段查清楚
絲絲睇完都好驚訝，但寧總好快就主動喺北京辦公室總部打電話畀內地傳媒澄清，話自己根本無被停職調查，仲話會通過法律手段將件事調查清楚。夜晚七點幾絲絲打咗個電話畀寧總，仲以為寧總一定會好火滾，點不知佢笑到嘻嘻聲，原來佢同朋友食緊飯講緊笑話，「外出學習」件事對佢一啲影響都無，但中糧集團旗下兩間上市公司中糧控股（00606）及中國食品（00506）嘅股價，就因為呢個傳聞而分別跌咗百分之二點四及二點九。
不過呢件事反令絲絲諗番起十幾年前中遠集團副總裁張大春嘅離任，當時都係傳媒報道話張大春即將調走，後尾張總仲開個記者會當場同嗰位記者對質，點知無幾耐佢真係畀人調走咗，家陣自己搞生意。寧總呢單傳聞係咪空穴來風，惟有等時間去印證啦！
余絲韻