本文重點
前稱智富能源嘅國際資源（01051），早排被人偷步沽空令到股價大插，件事轟動金融圈。佢哋近期靜咗一陣，尋日又有搞作，但今次並唔係收購、配股或者引入策略性投資者，而係進一步強化董事局及管理嘅班底。
出任國際資源副主席
公司宣布委任恒生銀行（00011）前大班柯清輝做副主席及獨立非執行董事，柯大俠同時會做埋公司嘅審核委員會及薪酬委員會主席添；原副主席Owen L Hegarty就會接替劉夢熊博士做主席，劉博士就退居幕後，只做執行董事。
公司無解釋點解搵柯大俠出山，不過銀行前大班想搵嘢做，情況應該同退休高官差唔多——都係唔憂做。但今次柯大俠搵咗間剛轉型做礦業嘅公司効力，好似同佢之前做開嘅銀行業無太大關係，加上公司股價早前大插插，睇嚟大俠呢次都要花些少功夫仔先得。不過大俠出名落力（聽聞佢以前喺辦公室會自己聽電話），絲絲都好想睇吓佢點樣締造一個多贏局面出嚟。
除咗柯大俠，國際資源仲搵咗五礦集團前高層馬驍做執董及副行政總裁，同時搵埋中國科技（00985）主席趙渡做執董添，淨係睇牌面，都已經知道國際資源嘅班底愈嚟愈唔簡單，真係邊類人才都有！
余絲韻