美股連升七日，上證又再發威，港股本來都升得好哋哋，尤其是股仔，在一眾新能源概念股帶領下，一眾股仔順勢炒上。點知歐洲市一開，期指立即倒水咁跌，影響晒市場氣氛，雖然期指係樣衰啲，卻可當一面照妖鏡，尋日唔少股仔尾市相當硬淨，計落應該有啲料到。
古晨留意到的，正正是恒芯中國（08046），早前發表的九個月業績，成功轉虧為盈。去年九月底集團成功購入資訊科技業務，更落實湖南、河北及河南三個電視項目合約，為期限三年，涉資80億元人民幣，在新業務啟動下，今年才可轉虧為盈。近日見隻恒芯喺0.6元收集好耐，尋日率先爆上，尾市見期指狂隊，不過恒芯買盤強勁，睇怕開車在即，暫睇1元，跌穿0.58才作止蝕。
古晨