尋日恒指回升，成功收復番50日線水平。細價股炒風再度熾熱起來，動輒都有一、兩成升幅，股仔再度落鑊，如果撞啱有心水又有勢的，不妨跟炒一轉。
至於回調一日後的上證指數，昨日再度呈強，最終收報3,145點。回想番早前，內地股市愈升愈有，真係有賴內地的新增貸款上升，令市場注滿熱錢。不過，隨着內地新增貸款不斷攀升，內地似乎亦開始察覺到嚴重性，近日人行就宣布要求一眾商業銀行，每日都要將新增貸款數字呈上，從而控制貸款增幅。咁樣一搞，熱錢收縮，股市再沒有新資金的流入，更甚的係游資將會撤走，唔排除A股後市將現較大調整，股友們要小心。
講開內地政策，國家電網就透露，為能夠完成制訂智能電網發展規劃，預計今後幾年每年電網投資均超過2,000億元人民幣，相信對於電力設備股前景有一定支持，不妨望多兩眼。
（小尾）