恒指啱啱先話跌穿位，怕大市將失守萬七，轉個頭美股隔晚勁升，港股急急腳升番3.6%，恒指報收17,885點，形勢繼續大好。詩詩所持國美（00493）開始接受供股，詩詩當然會參與，不過要月底先收到供股新股，相信截止供股前，點都炒一轉，屆時會先沽出手上股份。早段見亨泰（00197）無乜力，以0.47元沽出，其他股仔有番鑊氣，以每股0.126元，買入兩球聯康生物（00690），睇款仲有排炒。
詩詩見熱炒股仔整固咗一段時間後又再突破，第一視頻（00082）珠玉在前，尋日見中國資源開發（00661）上升破頂，成交又配合，可能係第一視頻翻版。
集團今年三月獲湖北大冶有色間接持股約15%，成為策略性股東，相信大冶有色的入股可為雙方帶來協同效應，並可於兩年內帶動公司現金流上升。市場亦憧憬大冶會注入其他有色金屬於上市公司發展，極有可能係金或銅礦。當然無論作任何注資項目，都要以股東利益為大前提，同時亦要配合國策發展。
純以走勢而論，中國資源在成交顯著增加下，升穿頂部突破，料升勢有餘未盡，短期有條件挑戰1元水平。
詩詩