本文重點
與投行界嘅人講起中國前總理趙紫陽媳婦任克英，相信無人唔識，呢位投行界女王自從五年前安排國壽（02628）喺港、美上市，與大內高手有衝突而突然離開花旗後，就一直低調行事，江湖上甚少佢嘅消息，但係佢轉親工，就一定傳到街知巷聞。
內企引外資軍師
尋日又流傳佢九月會過檔法巴，幫法巴嘅大中華投行業務揸旗。啱啱兩個月前，美林先證實佢辭去中國區投行業務主席職務，呢頭又被法巴網羅。
任克英咁受歡迎，唔單止係佢出身夠硬淨，最令人佩服係做嘢嘅魄力，佢經手嘅內地企業海外上市生意多不勝數，有國壽、聯通（00762）及建行（00939）等，就算呢兩年低調咗，但都幫美林做咗百仕通入股內地藍星兩成股權單生意。
間間投行都要打大陸市場主意，若然任克英加盟屬實，法巴就可更加發力。雖然法巴唔肯評論呢件事，但絲絲都睇好呢樁美事！
余絲韻