潮流興玩斬倉，周一斬完期指好友倉，周二又斬淡友倉，雖然大市暴瀉急升並非好事，不過總好過窄幅牛皮。雖然大市風高浪急，不過鑊鏟友呢幾日就最合皮，事關唔少股仔鑊氣甚重，啱晒班大炒鬼。
大市跌唔落，基金自然又要埋位掃貨，六月份內地汽車增長異常強勁，一眾汽車股人氣急升，東風汽車（00489）上周連升兩日，形勢甚好，周一稍作整固，昨日再見突破，似要起動。東汽這類基金股一旦異動，難免會引來基金入市追貨。
翻查東汽銷售成績的確不俗，六月份整體錄得15%增長，當中又以乘用車增長36%最省鏡，昨日率先開車，隨時出現旗形突破，焗班基金去追貨，量度計可以見9.5元，而止蝕位可放於6.3元。
古晨