花旗錢莊股被唱好，帶動金融股跳彈床，大笨象（00005）急升4.4%，報收64.05元，「渣兜」（02888）亦錄得逾4%升幅，報收149.3元。紅色錢莊前日被狂質，但昨日卻顯著反彈，中行（03988）跟交行（03328）升逾4%最本事，其他紅色錢莊亦閒閒地升逾2%。兩紅色保險股亦有追捧，平保（02318）升逾5%。

未宜過分擔心微調

周一仲擔心祖國會否實施微調，或拖累紅色地主下半年表現，前日跌到一仆一碌。古勝則預計北大人未必會收緊寬鬆貨幣政策，皆因祖國剛剛再重為魚缸新丁開IPO綠燈，又點會搞小動作影響市場氣氛，阻礙新丁向市場集資抽水。加上六月份上海二手房價格指數創歷史新高，成交量則創十年新高，反映祖國屋仔市場係有價有市，唔係純價格泡沫。紅色地主顯著反彈，龍頭中國海外（00688）升4.6%，華潤置地（01109）升逾6%，其他紅色地主普遍升3%以上。

雖然「油魔」未回勇，但多得「大魔頭」上調油價預測，國際油價三日來首度回升，帶動石油股做好。中石油（00857）跟中海油（00883）分別升4.1%及6.3%。油價回升，商品價格有運行，唔少以能源概念熱炒的股仔又再落鑊，缸邊友又埋位，股仔鑊鏟氣氛升溫。

母公司經營瓣數多

由華燊成功變身的濱海投資（08035），新主人係天津濱海區窗口國企天津泰達，入股濱海58.4%後，已積極進行重組，包括將濱投旗下30家燃氣接駁及銷售附屬公司一併售予津達，而新管理班子亦表示，唔排除向濱投注入多元化業務，實在值得憧憬。

濱海阿媽背景強勁，係天津市及濱海新區大型國有企業，主業管理及經營天津經濟技術開發區，業務瓣數多，已參與該濱海區的水務、能源、燃氣供應等公用事業；另亦從事財政、基礎建設、保險、工業、海洋發展、房地產發展、運輸、酒店及展覽、生態保障及風險投資，資產總值1,300億元人仔。

至於北大人雖有意栽培上海為祖國另一金融中心，但一直都以濱海區作為全國金融試點，相信濱海區在未來亦會繼續扮演呢個角色。若果從濱海投資呢個新名字去作合理推測，在下唔排除濱海投資未來會被注入金融業務。

不過，諗深一層，「投資」範圍可以相當廣泛，換句話講，濱海投資的可塑性甚高，自然更惹憧憬。最重要係天津泰達買入前身「華燊燃氣」換取上市地位的成本唔平，點計條數一股都要三四粒神，日後加埋注資價值，濱海股價翻一番見1元亦唔出奇。

古勝