本文重點
新世界發展（00017）執行董事鄭志剛今年底小登科，鄭公子作為彤叔長孫，早排已經搞咗個訂婚派對，嚟緊正式拉埋天窗相信都會大排筵席。絲絲尋日喺北京見到鄭公子，問佢心情緊唔緊張同籌備成點，鄭公子就展露一貫嘅陽光笑容，話一啲都唔緊張，仲話籌備婚禮方面會「精神上無限支持」，講到好似自己唔使點出力，因住未來老婆聽到唔高興喎！
新世界策投唔玩新股
相信鄭公子都係講吓笑啫，見佢平時工作都咁落力，自己大喜日子梗係唔會馬虎啦。好似早排有傳彤叔有意入股美國職業籃球聯賽（ＮＢＡ）嘅克里夫蘭騎士隊，鄭公子都覺得好無厘頭，咁絲絲就問佢，係咪因為佢去過睇波至畀人「誤會」，鄭公子就話佢如果有時間睇波就好咯！言下之意係平時工作非常忙碌。
咁又係嘅，鄭公子孭重飛嘅河內道項目下半年就推售，商場Ｋ11年底前開幕，招租都招得七七八八，睇怕佢嚟緊仲有排忙。
至於新股近排好似有啲回勇，鄭公子話佢負責嗰間新世界策略投資主要係做創投，而唔係投資新股，所以呢排啲洗頭水、運動鞋公司都冇興趣入股，堅拒不務正業咁話喎。
余絲韻