本文重點
小股東向上市公司管理層提意見，最佳機會一定係股東會，喺財經圈曝光率唔算高嘅生力啤（00236）管理層，尋日就領教過小股東嘅「積極」態度，小股東一時叫佢哋不如私有化，一時又要求佢哋減薪，搞到班管理層頭都大埋，唔知使唔使飲番杯啤酒消消氣？
無息派不如「嫁」咗佢
絲絲見近期上市公司提出私有化建議，全部都係大股東主動出擊，生力啤嘅小股東就好出位，反向大股東建議私有化，原來佢哋唔滿意生力啤3年都唔派息，生意又唔好，不如私有化或「搵頭好人家」嫁咗佢。
絲絲追問公司副主席郭嘉寧，佢表明公司無計劃賣盤或私有化；另一位執行董事譚嘉源話公司會做好本分，達到公司訂下嘅目標。
因公司生意唔好，有小股東建議生力啤班高層減薪，公司無正面回應。今年四月，生力啤嘅香港酒廠已經重新開工，管理層亦認為公司今年業務會有增長，絲絲覺得小股東要畀心機等吓，可能佢哋業務會有轉機。
余絲韻