大笨象最終報收66.6元，跌2%，祖國移動（00941）亦跌2.5%，報收77.8元。另一巨無霸港交所（00388）盤中死守120元，報收122.1元，跌幅收窄至1.7%。

內銀股有價有市

「油魔」繼續唔精神，打擊石油股及資源股士氣，中海油（00883）插水5.5%，失守雙位數，報收9.9元。中石油（00857）跟中石化（00386）則分別跌2.5%及0.5%。資源股係重災區，中鋁（02600）再插水3.4%，鞍鋼（00347）跟江銅（00358）分別跌3.5%及4%。本地地主亦沽壓嚴重，普遍跌2%或以上，「息魔」未有耐殺到，古勝相信係淡友隊冧指數的藉口。

平保（02318）增持深發展股權至爆燈額30%，而成事就算買貴咗，亦有助未來集團發展更平衡。不過前日復牌已插水，事關有消息話平保呢單刁未必做得成，昨日跌勢加劇，再跌5%，報收54.25元。

祖國保險企業卻打造為金融產品超級市場，入股紅色錢莊勢成風氣，紅色錢莊有價有市，建行昨日買盤強勁，下半場扭轉跌勢，倒升1.4%，報收5.71元。中行（03988）亦係少數逆市上升大隻佬，報收3.73元，升1%。其他「四行」全報跌，交行（03328）跟招行（03968）跌2%較多，工行（01398）跟中信行（00998）跌不足1%。

昨日登場新丁旭光（00067）表現出色，全日高位2.39元，高收2.38元，較招股價2元升近兩成，多得炒鬼捧場，鑊鏟氣氛高漲。旭光從事芒硝生產，芒硝可用於製造洗滌劑、紡織品、玻璃及藥品等，花旗家居用品商寶潔集團亦係其大客仔。

晒士細容易炒上

其實旭光經營的業務算係冷門，而且化工股唔易炒，故當初招股時孖屐反應一般，國際配售亦唔見有好多大孖沙捧場，缸邊友無諗過旭光登場有如此佳績。不過，旭光集資額只有11.54億元，晒士細細容易炒，即使IPO時人人有份，登場後再收貨亦無困難。加上唔少「中獎者」見昨日魚缸低開，見仲有胡食亦急急腳沽貨走人，令大戶在2.2元樓下輕易收集街貨。下半場見大盤掃貨，在毫無阻力下，旭光自然高收。

古勝相信旭光仲有得去，主要係魚缸游資仍充裕，當其他股仔無得玩，旭光自然吸引缸邊友入場，在你爭我奪下，股價梗係愈推愈高。

古勝