本文重點
近排樓市氣氛好咗，但係平盤愈來愈難搵，以低市價招徠的拍賣銀主盤，自然成為搶購目標，環亞物業拍賣董事曾傑俊同Vincent講，尋日佢哋舉行嘅私人拍賣會就賣咗5項物業，其中包括將軍澳居屋富康花園10座低層F室銀主盤，面積566方呎，成功以自由市場價賣咗149萬元，呎價2,633元，比開價足足高咗超過16%。Vincent八到，同類型單位嘅做價一般都超過160萬元，不過由於呢個單位嘅裝修比較陳舊，所以成交價都屬合理水平。
曾傑俊又話，同場拍賣嘅香港仔海傍道7號興偉中心地庫全層一共15個車位，成交價580萬元，較開價高超過20%，平均每個車位都要成38萬幾，以工廈車位來講都算幾好價。
波叔荃灣舖平租有因由
「舖王」鄧成波（波叔）一向深明商舖投資之道，Vincent收到風，佢持有的荃灣大河道登發大廈其中一個地舖，租約啱啱完咗，唔少商戶都爭住出價搶租，個別租金亦十分可觀，但波叔未為所動，暫時只做短租，估計月租大約5萬至6萬元，少過之前。聽中原鍾正求講，原來波叔諗住入則，將個舖打通作為樓上商場嘅另一出入口，若果成事，估計商場整體租金會上升最少10%，波叔一向都善於為購入的舖位增值，轉售時價值自然大大提升。
（Vincent Lau）