本文重點
近排圈中人茶餘飯後嘅話題，係搞緊旗下「大孖」中保國際（00966）全面收購「細孖」民安控股（01389）大買賣嘅「中國保險集團」，點解突然間放棄響噹噹嘅名號，改名為「太平保險集團」，圈中人都覺得太可惜喇！
被誤解代表全國行業
內地企業對「中國」兩字非常迷戀，但係中央驚國家嘅招牌被唔入流嘅公司敗壞晒，所以今時今日除咗中央級別嘅國企，都好難冠上「中國」嘅名號。
咁中保點解要放棄呢？聽講咁做都係迫不得已。因為佢哋成日被客戶同埋投資者問：「你哋頭先講緊嘅『中國保險』，係咪指成個保險行業？」次次都要解釋一番，都咪話唔煩。
中保自己唔覺得係放棄咗「中國保險」名號，而係加咗「太平」兩個字喺中間啫！呢兩個字呼應咗「為萬世開太平」嘅古訓，其實都幾大口氣㗎。之不過，新名號同「中國太平洋保險集團」只係差一個字，日後無論簡稱做「太保」定係「平保」，都會同人哋撞喎！
余絲韻