本文重點
金融海嘯震散晒環球嘅金融機構，不過滙豐銀行都算相當硬淨，喺最新發布嘅BrandZ全球最具價值品牌排行榜中排第四，係獲得最高品牌價值嘅國際銀行，大嗱嗱值成一百九十一億美金（約一千四百八十九億港元）。
咦！咁頭三名係乜嘢機構呢？絲絲一睇，同好多其他排名一樣，中資銀行包辦晒頭三甲位置。
整體排名工行奪冠
問鼎冠亞季嘅，分別係工行（01398）、建行（00939）及中行（03988）。雖然畀三大中資行騎住，不過滙豐都已經好開心，因為BrandZ喺份報告裏頭話，金融危機令好多西方銀行嘅品牌價值大幅下降，但滙豐係受影響最小嘅英國銀行，因為佢喺新興市場嘅龐大業務唔受金融危機影響。
滙豐亞太區行政總裁霍嘉治都話，報告證明唔係所有銀行都不外如是，反映滙豐係別具實力。
BrandZ專門調查消費者及商業用戶嘅品牌偏好，規模係全球最大。絲絲再研究吓名單，發現工行個標誌竟然用咗子公司工銀亞洲（00349）嗰個，睇嚟班外國人都要認番清楚佢哋先得！
余絲韻