本文重點
唔少銀行嘅股東會都喺五月舉行，滙控（00005）同埋中銀香港（02388）就喺今個禮拜，無獨有偶，兩者喺安排上同往年都有些少改動，絲絲就諗，唔通同金融海嘯之後，市民對金融機構嘅敵意大咗有關？
滙控另一樓層睇直播
滙控今日就會喺香港總行舉行股東非正式大會，星期五返去英國再開個正式嘅，同往年一樣都係由集團行政總裁紀勤主持，不過今年傳媒就要去另外一層睇個股東會，唔通驚小股東對前陣子供股嘅滙控嬲得滯，會有火爆場面？佢哋發言人就解釋話只係想地方寬敞啲，大家舒服啲而已。
至於有傳同證監會傾緊雷曼迷債單嘢點處理嘅中銀香港，今年股東會就移師會展舉行。有人同絲絲講，佢哋梗係驚有雷曼苦主係中銀香港股東，趁住股東會乘機賺門而入再發難，嚟一招「木馬屠城」，所以股東會由中環轉去會展。不過絲絲睇番資料，原來前年中銀香港都喺會展搞，唔知安排上係咪真係有考慮到呢個因素？
余絲韻