本文重點
港交所（00388）行政總裁繼任人熱門人選李小加近期震動中環，班董事如何揀出呢位繼任人亦被市場議論紛紛。上月剛被政府委任入港交所做董事嘅僑豐金融行政總裁許照中，同樣令市場感到有啲意外，不斷分析佢被政府睇中嘅原因。
許照中本人就話唔想作太多揣測，只係話近十年佢不間斷咁喺媒介上撰寫文章，評論及分析市場監管及發展，盡量避開講股票可能涉及嘅利益衝突，或者係其中一個令佢被政府委任嘅原因。
多得蔡太教路
佢仲公開多謝「股壇大姐大」蔡陳葆心，話係蔡太多年前叫佢改行呢條路，從而改寫咗佢嘅歷史。話說喺九十年代之前，許照中成日上電台、電視台講股票，但佢自九一年成為聯交所理事後，蔡太就叫佢要盡量避開可能涉利益衝突嘅嘢，就係咁，佢開始無公開講股票，反而專心鑽研分析市場監管。
蔡太對於許照中公開多謝佢，亦顯得好開心，話佢個人念舊、不忘本，又話佢熟悉本地市場，又可同政府溝通。港交所董事李君豪亦都好開心多一個行內人入局。
許照中話自己唔屬於任何證券組織，冇包袱，咁佢會唔會偏幫政府呢？佢答道：公道、合理及對市場好就支持。都好官腔呢！
余絲韻