過度交易對炒作成績會有好大影響，我個姊妹Ivey就係一個好例子。Ivey原本都係炒開一、兩手，最多都係四、五手，但最近開始炒到十手以上，結果受唔住壓力，大家唔好誤會，佢身體無事，只係原本沽住啲鎊，仲要每手捱價成百點嘅情況下，最終斬晒倉。點知上星期五隻鎊跌穿1.52收市，搞到佢好唔開心，因為原本啲倉全部有錢賺。
我以前好似都講過，如果你決定落重注嘅話，持倉時間就一定要縮短，而且有胡就要食，因為當你捱價時間愈嚟愈長、浮動虧損愈嚟愈大時，就會開始懷疑自己係咪已經逆市，如果又唔及時止蝕，通常都會導致喺高低位斬倉嘅情況，因為你會畀一啲幻想出嚟、比實際仲要恐怖嘅情況影響，心理壓力會好大。
尋日我冇追沽歐元或者英鎊，因為兩隻歐幣雖然弱，但比我想像中好好多，隻鎊仲守住1.51，歐元就跌到1.34廿幾三十幾，係都等佢彈番上去1.35先至可以考慮沽貨，當然仲要睇佢企唔企得穩啦，隻鎊尋日下晝上番1.52，咁又唔同睇法喇，結果我喺1.5248揸咗一手。
蘇小妹