本文重點
素有「摸王」之稱嘅資深投資者黎汝遠（黎Sir），除咗對買賣「磚頭」有心得外，對養馬亦有一番研究。黎Sir同Vincent講，佢匹愛駒「摸皇之星」經過多輪特訓之後，已經安排喺今個禮拜四首度出賽，為隆重其事，會在跑馬地快活谷訂定十多圍酒席，廣邀多位投資界戰友、銀行界朋友、地產代理及傳媒界，一齊欣賞賽事之餘，順道聚一聚。有老友估計，單係是次嘅使費最少要十幾萬。
黎Sir笑住講，榮升馬主後心情既興奮，又有少少緊張，睇見自己揀選嘅馬匹終於可以出賽，只要能盡力發揮就得，不過若能旗開得勝，就錦上添花。佢仲話，當日仲會宣布一項名為「群龍奪寶顯神通」嘅跑數活動詳情，以鼓勵代理今年幫他出貨及入貨。
西九總站規劃周五討論
政府近年不時會講吓廣深港高速鐵路嘅發展，不過就好少提及鐵路西九龍總站嘅上蓋物業發展，Vincent八到，規劃署原來已經趕製好呢幅地皮嘅規劃大綱，今個星期五仲會在城規會討論，由於社會上有唔少要求減建屏風樓嘅聲音，所以政府有關部門在處理這幅大地皮時，都唔願意多講或透露半點風聲，因此，最終嘅發展建議要稍後先揭盅。西九龍總站佔地達10公頃，其中約5.8公頃係交由發展局按一般政府地進行規劃，現時圖限嘅地積比率約9倍，市場普遍估計地皮可以發展地標式商用物業。
（Vincent Lau）