最近有公仔箱靚女主播與財經專欄寫手傳出緋聞，成為卜架們茶餘飯後嘅熱門話題，唔知係咪大家講八卦嘢愈講愈高興，行內人嘅八卦料亦愈爆愈震撼。筆者近日就聽到一個古仔，主角正係一名有好多師奶散戶捧場嘅財經分析員。
公仔箱風頭火勢
據八卦友報料，呢位經常出席電子傳媒節目嘅財經分析員，喺做完節目後鍾意同女主持閒談，仲喜歡介紹唔同嘅商界友人與女主持相識，成個大公關咁款！
不過近日有公仔箱女主播緋聞出街之後，電子傳媒高層都提高咗警覺，知道呢位「交遊廣闊」嘅財經分析員有咁嘅喜好，所以特別關注事態發展，費事多生事端咁話。
至於呢位咁「Nice」嘅仁兄係邊個，就留畀大家慢慢估！
余絲韻