本文重點
有遼寧首富之稱，剛啱喺香港上市嘅忠旺集團（01333）董事長劉忠田，作風一向好低調兼神秘，但有樣嘢仲神秘嘅就係，據講忠旺集團總部有一座比廈門遠華集團案中著名嘅「紅樓」仲要豪華嘅「小樓」， 又係專門用嚟接待去佢哋集團參觀視察嘅領導人！內地老友話，忠旺呢座「小樓」雖然神秘，但可以肯定嘅係佢份人出咗名唔鍾意撈偏，乜嘢事都依足手續，佢坦言「小樓」係接待領導人，所以叫絲絲唔好諗多咗喎。
搞上市謝絕來訪
不過啲內地媒體又話，忠旺集團喺搞緊嚟香港上市時，仲要神秘到幾乎謝絕來訪嘅一切人員，事關外來者往往都要經過重重關卡先可以進入，無論係遼寧省又好，中央級嘅媒體都好，劉忠田都會一一拒絕訪問，睇嚟真係好好好神秘喎，搞到絲絲好想去睇吓添。
不過其實忠旺集團總部佔地都有成18萬方米，內部就好似一個迷你社會咁，衣食住行幾乎都可以喺入面搞掂晒。
余絲韻