本文重點
近排股市氣勢如虹，升勢勁到大家都唔信，好多被金融海嘯摧殘嘅股票都揚眉吐氣，不過喺呢段升浪中，同屬於中保集團嘅中保國際（00966）、民安控股（01389）就聯袂停牌，錯過咗咁難得嘅快樂時光。
絲絲尋日見到中保國際兼民安控股董事長林帆，梗要追問佢停牌後嘅進展，但係林董淨係識笑，唔肯透露多半句，佢又話都希望快啲搞掂，到時一定會同絲絲講清楚。
旗下「孖寶」停牌涉購併
中保集團旗下「孖寶」喺上月三十日突然停牌，涉及中保國際同母公司買入民安股權嘅交易。雖然價格、條款都仲未知，但係市場對件事嘅睇法都好正面，因為中保集團係國有獨資保險公司，不過大家好似淨係識得國壽（02628）、平保（02318）、財險（02328）呢「三保」，根本當中保冇到。
中保國際舊年蝕3億元，民安亦蝕3.75億元，若可以整合集團內嘅產險業務，相信可以慳番唔少開支。呢條數，身兼集團董事長嘅林帆自然識計㗎喇！
余絲韻