本文重點
由歷屆香港小姐組成嘅「慧妍雅集」，經常進行公益善舉活動，而中華廠商聯合會（廠商會）舉辦嘅「工展小姐選舉」亦係歷史悠久，家喻戶曉，所以廠商會亦搞搞新意思，近期成立咗「工展芳華薈」，上月底更由廠商會會長尹德勝帶埋芳華薈班靚女成員出嚟，藉此加強宣傳工展會嘅品牌。
工展小姐組成「芳華薈」
廠商會搞芳華薈，據佢哋講，目的除咗係希望聚集歷屆曾經參選工展小姐嘅佳麗，讓大家互相認識之餘，亦透過參與廠商會會務活動幫助推廣，以至作各項社會公益事務。
廠商會上周末仲特別為「工展芳華薈」舉行第一屆執行委員會選舉大會，喺會員中選出第一屆執委會5個職位，包括主席、副主席、司庫、公關及社區公關主任，為期兩年，全部5人都曾參加工展小姐選舉，而第一屆主席就係第43屆工展小姐湯嘉雯。
據悉廠商會將於下周四（二十一日）假香港萬豪酒店舉行「工展芳華薈」成立典禮，並會邀請廠商會會董及「工展芳華薈」各會員一同慶賀。
余絲韻