古勝睇番魚缸走勢，加埋現貨場同期貨場的成交額，唔排除大戶開始轉向做淡，但又未儲夠淡倉，所以在16,800-17,500點之間上落，直至累積夠皮為止。
雖然「你戇」跟「美人林」繼續睇淡大笨象（00005），但亦有大行力撐，大笨象日前派今年首季成績表及公布首季派息，業績按季比較有所改善，亦符合孖屐預期，加上繼「高佬盛」上調其目標價至85元及調高投資評級，「瑞士佬」亦調升其目標價，指大笨象有望成為首批在祖國魚缸登陸的境外企業。
大象憧憬登陸祖國
由於祖國跟米字旗國達成協議，容許包括米字旗國在內，合資格境外企業到對方魚缸登陸，市場亦憧憬大笨象最快在數個月內完成在A股魚缸登陸的申請，消息刺激其股價升1.8%，報收67.3元。
祖國移動（00941）昨亦升1.3%，報收76.35元，為咗撐住指數，兩件重量級當然要落力參與。反而另一指數權重股港交所（00388）逆市跌5.8%，成為表現最差大隻佬。港交所可以話係魚缸溫度計，港交所咁樣衰，在下相信本地魚缸亦唔撐得耐。
紅色金融股個別發展，一直被批盪傳聞纏身的建行則先跌後升，工行（01398）跟祖國野獸（02628）則未能扭轉早段跌勢，散場逆市下跌。缸湖傳聞美銀已透過中銀，以極速向幾個投資者配售135億股建行解禁H股，每股作價4.2元，較昨日散場價折讓14%，美銀成功「籌旗」73億美元，係建行歷來最大策投減持。由於配售反應不俗，加上掃除批盪陰霾，建行午後倒升，一度重越5元水平，報收4.98元，倒升1.6%。
短期利淡因素消除
批盪版本有幾個，除咗係日前披露向美銀洽商接貨的祖國最大私募基金厚樸有份接貨，之前聲言主力投資資源股的獅城基金淡馬錫，在唔嫁又嫁的情況下，亦有份接貨。聞說祖國野獸亦認頭接咗貨，至於仲有冇其他「煙出挑唇」投資者接貨，看官最好睇番老記報道。雖然暫未收到風，匯金有份出手，即係建行唔似得工行有阿爺接貨，不過，如果野獸有份接貨，加埋厚樸出手，相信建行批盪後，有份接貨者唔會咁快掟貨套現。
既然建行短期利淡因素消除，以其基本因素，古勝仍然建議逢低吸納，作為長線投資，紅色錢莊的前景當然值得睇高一線。
古勝