本文重點
內地最新公布嘅經濟數據認真麻麻，絲絲同天津市商務部嘅老友傾開，老友話作為主要港口城市嘅天津都受到好大打擊。絲絲心諗喺咁差嘅環境下，惟有放慢嚟做，待金融危機過後，經濟環境又有一番新景象時可以再博過啫！
一星期做足7天
點不知老友話梗係唔得啦，事關佢哋個市委書記要求政府上下各部門要「5+2同白+黑」咁做嘢，即係5天工作日加兩個休息日都要做嘢，仲有就係無論白天定係黑夜都要隨時On Call。
至於做乜咁忙，咁就梗係大家度吓有乜嘢可以提振經濟，政府可以畀啲乜嘢政策去扶持發展之類喇，所以壓力反而大過以前好多。不過老友都好有專業精神，都無乜怨言，反而希望天津市真係可度過今次港口經濟下滑嘅難關。
絲絲又諗起以前成日都會喺香港見到呢位老友，依家好少見，幾乎年幾先見佢嚟一次，問佢係咪受金融危機影響，佢話唔關事，係因為以前個市長戴相龍同香港財金界好熟，所以好鍾意叫天津市政府官員多啲嚟香港交流，家陣戴相龍調走咗，所以佢就少嚟咗香港。
余絲韻