本文重點
銀行界今時唔同往日，好景嘅時候做銀行特別搶手，一年轉幾次工毫無難度，好似一個做銀團貸款嘅朋友，一年跳三次槽，每次加薪兩、三成，但依家已無呢支歌仔唱。
舊年年頭見呢位專責銀團嘅朋友時，佢仲喺一間外資行做，年中見佢已轉咗另一間外資行，不過最厲害嘅，係隔幾個月又轉咗去一間中資行做，莫非佢有水晶球預計到轉去中資行先有運行？
除咗次次派嘅卡片都唔同，呢位主管曾透露每次轉工都加薪兩、三成，吃香到不得了，不過今次再見番佢，佢仲係派緊張舊卡片。
未畀人炒已經萬幸
呢位主管話依家市場靜到不得了，喺呢個「人求工，而非工求人」嘅時勢，佢都只好安定落嚟，一年加幾次人工嘅風光史不再，仲自嘲「未畀人炒已經萬幸」。
其實喺中資行做已經算係咁，有啲喺規模較細、於本港專做銀團嘅外資行做嘅主管話，唔少有需求嘅企業，寧願搵幾間中資行以俱樂部貸款（Club Deal）形式搞掂，呢啲先叫真係無啖好食！
余絲韻