本文重點
利豐（00494）去年盈利較前年倒退逾兩成，不過其話事人馮國綸董事酬金就不跌反升，睇番新鮮出爐嘅年報，身為董事總經理嘅馮國綸去年董事酬金較前年勁升近五成，至2,962萬元，當中2,472萬元為酌情獎金，其薪金亦由前年嘅228萬元急升逾一倍至480萬元！
近3000萬超越總裁
雖然利豐去年盈利錄得自○一年首次倒退，但箇中原因係期內有多項一次性支出，加上金融海嘯，所以馮國綸酬金調升亦可以理解，若馮國綸能順利完成截至明年新一期3年計劃，相信未來酬金更可觀。
至於馮國綸嘅得力助手、現任利豐總裁Rockowitz，前年酬金達2,037萬元，當時仲多過馮國綸嘅2,009萬元，而去年Rockowitz酬金雖然亦較前年上調26%至2,566萬元，但就少過馮國綸，換句話說，馮國綸今年做番利豐董事酬金嘅No.1啦！
余絲韻