本文重點
賣國產名酒五糧液賣到上市嘅銀基國際（00886）尋日掛牌，雖然股價最後收報3.11元，比招股價跌咗差唔多一成，但老闆梁國興心情依然靚絕「勁飲」，夜晚仲拉大隊返深圳開慶功會，聽講連明星任達華同夏韶聲都有到場助興，老友笑笑口同絲絲講，唔知梁老闆會唔會「隊」佢哋飲番兩杯呢！
嘉賓「敬酒」頂得住
話說梁老闆尋日一去到港交所（00388）就不停畀嘉賓「敬酒」，公司都未正式掛牌交易，絲絲就見佢已經畀人「隊」到面紅紅，但話晒都係賣酒起家，梁老闆依然精神爽利，接受記者採訪嗰陣對答如流，仲不忘推介吓五糧液，唔單止送咗支攞過「巴拿馬金獎紀念酒」嘅五糧液畀港交所，仲同記者講「五糧液咁好，梗係飲多兩杯」！
查實尋日絲絲一去到港交所已聞到一陣濃烈嘅白酒味道，仲見到一大班嘉賓搏命「敬酒」，老友同絲絲講梁老闆應該會直落飲到去深圳開慶功會，佢話雖然唔知梁老闆係咪任達華同夏韶聲「粉絲」，不過就應該唔會叫夏韶聲唱番佢支首本名曲《空櫈》咁掃興，同埋應該會請佢哋飲番兩杯五糧液囉。
余絲韻