本文重點
美國前財長保爾森去年奮力救市，應付由美國佬自己搞出嚟嘅金融海嘯，咁你估吓佢36歲嘅兒子Merritt又奮力搞緊乜？真係估都估唔到，小保爾森Merritt奮力想喺美國Portland引入美國職業足球大聯盟（Major League Soccer），仲話用咗老爸成5,000萬美元，但「臨門一腳」卻與地方人士傾唔掂財務安排，自己又唔可以再用屋企錢，所以最終或要繼續搞棒球隊以及留喺小型棒球聯賽內。
用咗阿爸3.9億
貴為高盛前大班嘅保爾森，幾年前過檔做財長時身家已有5億美元，肯攞5,000萬美元（約3.9億港元）畀個仔，等佢可以將Portland嘅小型棒球隊Beavers搖身一變成為美式足球隊，仲要改建埋個球場，符合美職足球大聯盟賽事規定，真係愛子心切。
雖然Merritt已攞到市議會支持，仲用3,500萬美元攞咗個足球聯賽特許代理權，但除非市議會總監願意放棄喺現有球場旁建立新市政區及發行1,500萬美元債券計劃，否則Merritt就有筆1,500萬美元嘅數要填，亦令個新球場唔可以趕及二○一一年聯賽賽期，不過Merritt講明自己唔可以再用屋企錢。現時位處球場附近嘅學校又大力反對改建計劃，話改建會影響學校收入及增加財政危機，所以無得傾。
余絲韻