唔知係咪因為就快放復活節假，呢個星期個市好古怪，平時冇乜波幅嘅東京市，呢幾日都好波動，淨係隻歐元跌得比較單邊，隻鎊星期一挾番上1.49之後即日倒跌收市，但星期二就玩單日轉向，由1.46樓下挾番上去1.47，點知尋日又跌番去1.46，手鎊暫時揸住先，再穿1.46先算。
暫時睇，隻鎊跌番轉頭，主要係上星期升得太急，累積升幅超過800點，如果回番一半嘅話，連1.4550都頂唔住，所以就算前日跌到1.45八十幾，都未算係調整完成。不過，掉轉頭睇，隻鎊調整唔夠之前升幅嘅一半，即係個勢仲係向上啦，所以我對英鎊喺復活節假期後嘅表現仲係審慎樂觀。
今日英倫銀行公布議息結果，我估好大機會唔減。不過以陰謀論睇，啲大戶可能會先沽到隻鎊有咁低得咁低，等嗰啲一早入咗市嘅好友震晒出去，先至大大力挾上去，又或者等英倫銀行宣布唔減息之後先至沽鎊。不過，有重要數據公布當日，個市其實會幾好炒，因為數據公布前，個市會變得好穩定咁行上落市，所以最啱炒range，再穩陣啲可以淨係炒東京市。
蘇小妹