陳凱琳慶幸佗仔保住地位

佗B仔的陳凱琳，着高踭鞋出席活動搵奶粉錢。

藝人陳凱琳（Grace）、孫慧雪及劉穎鏇（Tiffany）前晚到屯門出席「V City甜蜜倒數迎聖誕」活動，三人輪流獻唱及玩遊戲，更獲新鴻基地產代理有限公司租務副總經理孫雅茵送上禮物，Grace收到的是老公鄭嘉穎與她的合成BB照，非常溫馨。

早前公布佗男丁的Grace，笑言今次帶了「Baby Kevin」出活動：「今年仲係二人世界過聖誕，相信出年家庭溫暖會好唔同，嘉穎喺美國登台啱啱返，仲未見到佢。（開始買BB嘢？）想揀吓先，要忍手，驚成屋都係。（嘉穎買嘢狠過你？）係呀！佢成日叫我行街睇BB嘢。（你會唔會呷醋？）好在係仔，如果女嘅話，我地位可能降級，反而係嘉穎叫我唔好掛住個仔而唔記得老公。」問到媽媽是否搬往同住照顧她？Grace否認，並指媽媽只是來煮食，又否認搬新屋安胎。她透露現時每個月最期待照超聲波看BB的模樣，對於之前嘉穎誤會臍帶是「何B仔」，問BB是否很「大條」？Grace只笑說：「佢依家知道，唔會再犯呢個錯。」

孫慧雪激動：唔生住

現場獲贈大肚照的孫慧雪，問是否想湊夠「好」字？她即激動地說：「冇！工作排到滿晒，呢一年都唔諗住，老公都OK！（想追多個？）過幾年先，湊BB好攰，又要拍劇。」Tiffany則自爆平安夜沒有男仔約，但有爹哋陪：「我要拍新劇《唐人街》，爹哋陪我睇7集劇本，今次劇本係實體紙本，冇得用apps翻譯，我好似做番學生咁，要用螢光筆Mark低！」

陳凱琳與Fans合照時，不自覺凸顯孕肚及升Cup上圍。

孫慧雪（左起）、新鴻基地產代理有限公司租務副總經理孫雅茵、陳凱琳及劉穎鏇合照。