誓搣40磅肥膏陸家俊返嚟喇！

90年新秀出身的陸家俊於92年出處男碟，翌年卻因拍MV受傷而退出娛圈，至千禧年復出拍劇，但不久又銷聲匿迹，到早幾年成立娛樂公司，最近更宣布復出幕前！昨日他接受本報專訪，透露去年有DJ朋友叫他參加外國音樂節，因此產生興趣，本周六更首次在港出DJ騷。與此同時，簽新經理人公司的他獲《流行經典50年》邀請，暫定12月上節目：「因為螢幕拉闊咗，要Keep Fit先，想起碼減40磅。」並表示最高峰試過近250磅，但不肯透露現時體重。

拍MV傷腳退出

問到心態是否已準備好？他說：「其實冇乜嘢，但都要睇吓反應，唔知大家鍾唔鍾意。」講到輾轉復出，是否對娛圈念念不忘？他坦言：「由細到大都玩音樂，好難脫離到呢個興趣，但唔啱嘅時候咪唔做。」當年退出會否覺可惜？他說：「當年拍MV跌倒，隻腳撞到爆血管，腫到3隻腳咁粗，住咗兩、三個月醫院，出院後想去美國進修音樂。後來去咗外國，成日睇TVB劇，對演戲有興趣，但返嚟拍咗幾年劇冇再做，覺得火喉未夠，對續約好懶散，可能當時仲係廿幾歲。」現時成熟了，他認為是更好的時機：「人嘅歷練好緊要，記得以前問過周潤發演戲心得，佢話要周街望嘢，觀察人生百態。」

「多謝冇遺忘我」

當年他與蔡興麟總被人相提並論，問到今次可怕又被比較？陸家俊笑言：「有比較過咩？其實係因為軟硬天師嘅《廣播道Fans殺人事件》提咗我哋個名，後來少爺占做廣播劇用我個名做角色名，當奴就叫『蔡興麟』，搞到啲人成日以為我哋黐埋一齊。（同佢有聯絡？）成廿幾年冇見過。」隨着黃翊、蔡興麟等歌手輪流復出，網民都不忘「召喚」他，他笑言：「好多謝大家仲記得我，真係好Surprise，原來大家冇遺忘過我。」又笑言早幾年出街有人認得，但近年沒有，可能是肥了！

場地：BOOM LAB