劉佩玥擔心病情喊足兩日

劉佩玥知道化驗結果是良性後，梗係鬆一口氣笑番啦！

無綫劇集《跳躍生命線》演員馬德鐘、劉佩玥、何廣沛、羅天宇等在寶琳一間小學宣傳，期間劇中一眾救護員即席模擬為打波拗柴的劉佩玥急救。劉佩玥近日淋巴及免疫系統出問題，幸而抽組織化驗後證實不是惡性：「最初發現下巴腫咗、有啲凸出嚟、仲硬硬哋，睇醫生抽血、化驗，睇超聲波都見到下巴三個淋巴核脹起咗黐埋一齊，醫生用支針插入去抽組織化驗，我同醫生講抽埋佢出嚟咪冇事囉，當時其實好緊張，諗住講笑輕鬆吓。」

等待化驗結果時，劉佩玥擔心了兩日，驚到喊，慶幸化驗結果是良性：「依家下巴腫脹已經消咗，但係頸上仲有一粒淋巴腫起，醫生話要休息多啲，但係拍劇時間控制唔到，有時間可以休息吓。」

讚周志文好好

問到緋聞男友周志文可有關心？她笑說：「文仔不嬲都好關心我，大家都係朋友，佢除咗短訊、電話，都有直接叫我食嘢要食得清啲，唔好飲咁多珍珠奶茶。（感情跨進一步？）感情不嬲都好嘅。（有冇加分？）都唔使加分，佢不嬲都好好。」

活動期間，眾演員公布劇集七天跨平台總收視首集高開27.1點，第六集更錄得至今最高的29.2點。馬德鐘希望能衝破30點，並衝擊全年本地製作最高收視劇集，笑言郭子豪準備好除衫答謝觀眾。問到有否信心在台慶頒獎禮攞獎？他說：「有獎梗係開心，但唔敢奢望。」又睇好何廣沛奪「飛躍進步獎」及能夠殺入「最佳男主角」最後五強，何廣沛聞言笑說：「有你喺度，我入唔到閘，提名都冇。」

下巴雖然已消腫，但頸上還有淋巴脹起。

馬德鐘與何廣沛模擬急救，扮受傷的劉佩玥扁晒嘴。