郭富城獲贈一世任食火辣辣

郭富城昨日與嘉賓Ray（左起）、Alan、重慶劉一手火鍋創辦人劉梅、鄧成波、老闆Francis及Adran，為旺角旗艦店進行剪綵儀式。

郭富城（城城）昨日為「重慶劉一手火鍋」全球第1108間旺角旗艦店開幕擔任主禮嘉賓，合共三層的店舖面積約12,000呎，設計古色古香。城城笑言無辣不歡：「大家講起郭富城就會諗起麻辣火鍋！其實係我讀書時期，爸爸成日帶我去消夜，都會喺啲餸菜度加辣椒，假日煮飯嘅時候都會煮辣嘅餸，養成咗我無辣不歡嘅口味。」又自爆經常返內地工作，通常獲安排食麻辣火鍋，更試過一星期食足七日。

諗過開舖　呻忙打消念頭

本月26日踏入53歲生日的城城，即場獲老闆送上店舖「一世任食」的VIP卡及火鍋造型的生日蛋糕，令他喜出望外，並即場許願。問到可有想過自己開火鍋店？城城表示以前有諗過：「不過依家有得免費食，自己最鍾意嚟呢度食！始終做生意要落手落腳，自己工作太忙，所以打消念頭。」經常周圍飛品嘗火鍋店無數，他對此店舖讚不絕口：「劉一手真係好值得推薦，同重慶老店一樣咁好食！始終打邊爐啲材料夠新鮮好重要，所以我好重視材料，呢度就天下無敵。」至於太太方媛是否同樣食得辣？他坦言：「好似我食得辣啲，但屋企人都會陪我食，會就我食辣，太太都可以食少少。（佢依家係咪唔食得辣？ ）唔會！都會食少少。」城城又笑言如今獲終身任食，真的可以晚晚吃火鍋：「我真係可以食足咁多日，唔係誇，係真係熱愛。」

城城獲老闆Francis送上「一世任食」VIP卡，笑到四萬咁口！	城城見到「火鍋蛋糕」勁驚喜，讚老闆夠貼心。	何艷娟化身「辣」妹撐場。

留港綵排 有時間陪妻女

問到生日是否吃麻辣火鍋慶祝？城城笑說：「好建議！（你依家衣食無憂？）唔係，只係免費食火鍋，間中都要食吓中餐，飲吓涼茶解一解。」又透露生日正日要工作，最近工作忙碌，要綵排演唱會、廣告宣傳及拍電影：「嚟緊要通宵排舞，準備11月廣州嘅演唱會！今次加咗啲新元素，原本開一場，因為反應太好，所以會加多場，個場地好難得可以加場。（咁忙咪少咗時間陪太太？ ）唔會！反而多啲時間陪屋企人，因為我要留番喺香港做總綵排，咁就陪到佢哋。」講到生日願望？城城只求簡單：「就係身體健康同工作順利。（想唔想生多個BB ？ ）我都講過等個天安排，順其自然就最好。」

郭富城讚「劉一手」用料新鮮，天下無敵。

郭富城主持揭幕禮，吸引大批傳媒採訪。