Dear Jane進軍紅館想索女陪唱
樂隊Dear Jane前晚舉行音樂會，尾聲時四子宣布明年3月16日首次在紅館開騷，全場歡呼。他們完騷後接受訪問時表示，早前已得知申請成功，成員Howie更大呻保守秘密幾個月很辛苦：「申請咗好幾年，次次都唔中標，今次中標有少少覺得終於輪到我哋嘅心情。」他又稱開騷前曾向導演要求舞台有噴火特效，及一大班女Model演出，但被對方拒絕，希望於紅館開騷時願望成真：「有女Model視覺上多啲嘢睇，例如跳舞，我哋陽氣盛，要女仔溝番勻。」Tim亦稱屆時會帶囡囡睇騷，又指囡囡聽到喇叭大聲就驚：「佢即刻攬實我，終於感受到父愛。」
