關智斌搞喊軒仔：呢個人好重要

BOYZ前晚在九展Star Hall舉行首次《BOYZ THE UNBOXING LIVE》演唱會，不少歌迷應要求以校服Look到場集體回憶。兩人開場大唱《Ready To Go》和《LaLa世界》勁歌熱舞，還打後空翻及側手翻一展身手，脫去外套的Kenny在黑背心下晒出結實胸肌，非常吸睛。

當晚請來組合艾粒和Twins任表演嘉賓，蔡卓妍（阿Sa）上台即變喊包：「當我知道BOYZ開演唱會，我係好開心，佢哋兩個係識一世嘅朋友嚟。」又讚Steven大個仔：「佢一直係我哋大眾細佬，但個樣就唔係囉，好老懷安慰！」四人合唱《死性不改》後相擁，阿Sa更被Kenny取笑喊到眼腫。

BOYZ一時感觸變大喊包。	張敬軒與BOYZ來個愛的抱抱。	愛的紋身

甘做背後的男人

Steven更派「洋葱」自責當年做好多事令大家失望，多得Kenny支持他：「前幾日我瞞住你去做一件事。」原來他將「BOYZ」紋在心口，提醒自己要上心：「呢個係對自己一個警惕，因為若我傷害自己，即係傷害咗我拍檔。」搞到Kenny不停拭淚。

張致恒表演單手倒立。

關智斌着小背心晒麒麟臂。

演出期間，Kenny每次說多謝時，台下歌迷都大叫「張敬軒」，原來對方一直低調在控制台做「幕後功臣」指揮。Kenny說：「呢個人好重要，佢喺呢個騷幫到我哋好多，今晚佢坐喺Panel位度，做一個特別嘉賓、一個特別顧問，多謝你張敬軒！」在控制台的軒仔終除下口罩，在全場歡呼下上台與BOYZ熊抱，並說：「我啱啱都喊到咩咁，好多回憶，同埋好開心咁多朋友嚟支持你兩個。我哋係同年新人，好開心見到呢兩位同我一齊長大嘅人，佢哋曾經放低唱歌嘅夢想，去其他地方發展，而有你哋支持，佢哋將過去承受嘅經歷、痛苦、辛苦都一筆勾銷。」Kenny再次多謝軒仔當年送一首《預言書》給他，之後三人合唱掀起高潮。

明年進軍紅館？

完騷後，BOYZ受訪談到軒仔「自動波」幫手，更將私家咪借給他們：「知我哋開演唱會，佢覺得係佢一手造成，冇理由台上失禮，所以出手相救，希望出嚟啲聲靚啲，又教舞台技巧。」問可會像Steven一樣將「軒仔」兩字紋上身答謝？Kenny說：「呢啲嘢……其實我都唔知Steven做呢啲嘢，搞到我眼濕濕。」問明年是否進軍紅館？他說：「頭先見到老闆（楊受成），佢話好彩7年前冇炒你哋，咁睇吓明年邊個場做啦！」