森美差錯腳拗柴死頂繼續開工

森美昨日為《過》劇拍攝一場由貨車頂跳落地的鏡頭，並非專業動作演員的他，不小心扭傷腳，他受訪時說：「唔嚴重好小事，嗰場戲已經拍咗兩個動作，只係喺貨車頂跳落嚟，已經墊咗兩層榻榻米好安全，但我隻腳剷咗落榻榻米個罅位，所以扭到，不過尋晚我都有返廠繼續拍攝，有少少痛啫，文戲冇問題，跑就唔得，希望呢個星期好番！」

「嗰下好英雄感」

他續說：「今日假期搵咗相熟朋友介紹醫師畀我，依家隻腳有啲腫，我最驚係影響拍攝，其實拍嗰場戲因為扭到，已經減少咗動作，但都要完成埋拍攝，嗰下都覺得好英雄感，受咗傷都要完成埋佢，有一刻覺得自己好專業，其實我只係扭傷。」

此外，森美和黃翠如日前開工拍劇，講述翠如化身貴婦帶狗狗入名店，期間狗狗失控，森美協助追狗，他更要捱翠如掌摑。事後問本身有養狗的翠如會否較受「狗演員」歡迎？她笑言：「一開頭係好啲，因為我身上有狗除，不過耐咗就冇用，因為見到我哋就冇自由，要坐定定。」她又指曾有廣告商上門找她跟愛犬合作：「佢太細膽，我幫佢推咗！（做明星狗幫手搵錢？）佢係我哋寶貝嚟，如果我肯，父母會殺咗我！」

森美協助追狗，場面搞笑。

森美拍動作場面不慎拗柴，現時出入要靠拐杖。

羨慕男友遊瑞士

提到男友蕭正楠與曹永廉到瑞士「風流快活」，問她會否見到兩人的合照而眼火爆？她笑說：「反而好羨慕佢哋有免費旅行，瑞士使費貴，飲杯水都貴過人，聽講佢哋仲係坐商務添！」