琦琦唔想做星媽
名模琦琦與歐陽妙芝昨日出席校園音樂大賽總決賽，琦琦表示早前與囡囡到了歐洲八個國家旅行，增廣見聞：「差唔多去咗半個地球，返香港後再同老公去泰國，咁啱係當地母親節，囡囡買咗芝士蛋糕同我慶祝。」提到日本萬人迷木村拓哉的15歲細女甫出道即引起關注，琦琦表示：「我個女得13歲，呢個年紀應該讀書，但木村個女真係好靚。」
至於歐陽妙芝表示兩個兒子都喜歡表演：「佢哋會主動參加學校嘅課外活動，細佬怕醜少少，大仔喺公開場合都唔怕醜。唔阻佢哋入行。哥哥最近報咗個國際藝術交流團，佢已經13歲，好獨立。」同場的太子珠寶鐘錶主席鄧鉅明太太鄧宣宏雁透露，剛去完俄羅斯八天郵輪旅行休息。而國寶級歌唱家周詠琁為活動擔任藝術總監，大讚參賽小朋友的水平很高。