劉穎鏇遊韓太嘈呻冇Oppa埋身

Tiffany與Jennifer昨日以短褲騷長腿兼露臍打扮現身上水廣場X《emoji Sports Fiesta 2018》揭幕禮暨傳奇再現––英超足球邀請賽記者會，現場更有13位前英超球星，吸引逾百巿民圍觀。

Tiffany透露最近與一班「是非精」齊往韓國拍特輯，問到有否艷遇？她笑說︰「冇，其實次次都冇，所以呢次冇係好正常，因為我哋太嘈嚇怕男仔。」她指在韓國試玩Sky Jump，由十幾層樓高再急降：「我好怕離心力，未開始已喊到降落，嚇親韓國教練，佢不停問導演我係咪OK，我死頂完成。」

屎波怕守龍門

對於有指她頂替港姐冠軍雷莊𠒇拍宣傳片，她否認：「一早搵咗我拍，或者係佢檔期問題。」另外，Tiffany坦言睇波只看靚仔球星，但自己就不擅長踢波：「我唔夠氣，跑得唔夠快，又唔會守龍門怕食波餅，只會貼近龍門踢個波入去。」

校隊踢到腳粗

至於Jennifer自爆小學曾是足球校隊，曾得過銅牌，但自嘲雙腿因踢波而粗壯。講到睇波，她坦承愛看靚仔：「世界盃鍾意阿根廷，因為最鍾意嘅球星係阿根廷嘅保羅戴巴拿，至於英超睇曼聯，我鍾意勞基梳爾，佢係我第一個發現到嘅小鮮肉，唔知係咪我邪到佢，喺社交網follow完佢之後嗰場比賽，佢就斷咗腳。」她稱與男友陳家樂睇波時通常支持同一隊伍，故不會鬧交。

曾是足球校隊的余香凝，頂波頂到冇眼睇。

新鴻基地產代理有限公司租務部總經理鍾秀蓮與前英格蘭國腳蘇甘保合照。