基仔拉攏「新五虎」合體玩謝古天樂
經過24年洗禮，古巨基成功號召「新五虎」合體在紅館高歌，五子在台上大講有味笑話，日前差錯腳墮台的基仔被讚夠堅挺，他即自爆一招「動L」大步檻過；而當古仔聽到其經典歌曲音樂響起，即當眾指罵監製「玩嘢」！
古巨基前晚第四場演唱會找來廿幾年前無綫力捧的好拍檔「新五虎」古天樂、吳家樂、劉愷威及何遠恒做嘉賓，全場哄動，基仔說：「今日好難得，上次約得四個差一個，今日幾經辛苦搵齊五個。」古仔上台後叫兄弟在「案發現場位」企前少少安全一點，又望着基仔說：「你都好嘢，咁都冇事！堅挺即係堅挺！」基仔笑說：「我巨肌嚟吖嘛！」古仔再說：「你就係落台嗰下靠條巨肌撐一撐，所以冇事呀！」基仔說：「係呀，我動L咁彈番轉頭。」家樂即說：「唔怪得Lorraine跟你咁多年啦！」劉愷威更爆料笑「基仔成日好濕」，令觀眾捧腹大笑！
「唔好逼我跳舞」
五子在台上重演當年的舊合照甫士，之後趁基仔換衫，古仔將何遠恒與李彩華分手一事擺上台：「你同個咩彩華散咗……係咪嗰晚我哋約食飯你冇出現，去咗滾所以散呀？」何遠恒耍手擰頭：「唔好講呢啲啦。」當四虎問觀眾想聽甚麼歌，觀眾大叫古仔的《男朋友》、《今期流行》，現場即響起《今》的音樂，古仔指着坐於控制台的監製錢國偉笑罵：「肥仔，你唔係真係玩嘢呀？」何遠恒、家樂就隨音樂大跳古仔當年的「拜神舞」，現場爆笑，古仔叫大家放過他：「歌可以唱，舞就唔好逼我跳啦！我拜神拜咗咁多年，唔好搞我啦！」之後基仔再上台與四虎邊唱《我愛毛查查》邊與觀眾握手，氣氛熾熱。而昨晚尾場，開騷前基仔再次誠心上香，口中唸唸有詞並拜齊四角，Lorraine則陪伴在側。
文：音樂組