蔡興麟回歸樂壇自嘲「木村頭」難頂

蔡興麟前晚與李樂詩（Joyce）、薛家燕及陳敏之等到將軍澳電視城錄影《流行經典50年》，他表示已廿多年沒返TVB，今次是第一次到將軍澳電視城。問到會否陌生？他說：「唔會，雖然第一次嚟，已經好感動，有太多回憶。」

自認當年保守

講到當年離港，他先後到台灣、日本和內地發展，在內地主要拍戲，亦有登台，並透露將推出慈善國語及粵語唱片。問是否復出樂壇？他說：「可以咁講！（唱片自資？）會同公司傾合作，同埋會開演唱會，10月喺上海開，香港未知。」問到是否已婚？蔡興麟笑說：「都希望係，但緣分好難講，有就會公告天下。（有冇拍拖？）……有啲啦……（一個地方一個女友？）我冇講呀！始終我成日周圍飛，聚少離多，比較難維繫。」回想當年，蔡興麟曾與張學友、張智霖、陳小春及陸家俊等以水上Look出席電台活動，眾星打大赤肋晒肌，唯獨蔡興麟穿一件頭泳衣，他哈哈大笑說：「記得！當時係籌款騷，大家都着泳褲，我當時風格係復古。（你好保守！）我真係幾保守(O架)！ 」

李樂詩介紹「筍盤」

提起在台灣、日本發展時曾留長髮，猶如「港版木村拓哉」，他竟視之為黑歷史：「公司安排我要華麗，着啲鮮艷顏色嘅西裝，依家唔好搞我！一完約可以剪頭髮，我就即刻剪短！」問有否跟同期新人聯絡？他表示失聯一段時間，近年透過網絡與劉雅麗、黎瑞恩、李蕙敏及Joyce等舊友重聚，至於陸家俊，他說：「冇啦！當年係同一間公司嘅。」而蔡興麟母親沈月華是粵語片時代演員，阿姨沈芝華是七公主之一，今次他返電視城亦是由薛家燕引薦。

Joyce透露節目中與蔡興麟合唱《Endless Love》，是兩人相隔26年再合唱。講到對方仍未婚，她笑言：「我都有啲筍盤，睇佢啱唔啱，不過知道佢成日飛嚟飛去，都幾難！」

文：影視組