方中信等足30年 孖鮑起靜鬥戲
影后鮑起靜魅力非凡，吸引私交甚篤的方中信爭取機會與她演對手戲。「小鮮肉」陳家樂則被鮑姐的「戲」場懾服，日日獲影后「身教」，獲益良多。
鮑起靜、方中信、陳家樂及陳嘉莉等忙於拍攝新片《一級指控》，日前拉隊到深水埗一間菜檔開工。劇情講述鮑姐因孫兒被控謀殺，特意求飾演律師的方中信及陳家樂出手相助。劇組用黑布圍着出入口，以防拍攝曝光。約1小時後完成戲份，鮑姐即低調離場。據悉，今次方中信、廖啟智及譚耀文等好戲之人，有多場法庭角力戲，難怪方中信接受訪問時坦言被冗長及專業的台詞「考起」，準備工夫較平時拍戲多出兩倍。
陳家樂獲益良多
方中信笑言最開心是首次與「契媽」鮑姐合作：「大家識咗30年，終於有機會演對手戲喇。（鮑姐戲內戲外有咩分別？）冇喎，一樣咁和藹可親。」由於他有份演出的英皇網劇《PTU機動部隊》尚未煞科，「兩邊走」的他近日嚴重缺乏休息：「但聽到班底咁好玩，梗係要接啦。」
陳家樂則笑言每天開工，都似買飛入場睇戲：「鮑姐真係勁好戲，嗰頭同我哋開開心心咁傾偈，轉頭一叫埋位就可以投入喊到收唔到聲。入戲院睇戲都有剪接吖，我坐喺度係睇未經剪接嘅精彩演出，絕對學到嘢。」
陳嘉莉逃跑跌傷
至於陳嘉莉與男友張建聲亦有份參演《一》片，但卻未有同場，反被演奸角的男友買兇追殺。嘉莉笑言：「今次真係好多逃跑戲，之前拍咗幾場，我都唔小心搞到有瘀傷。（介意同男友演對手戲？）唔會，我當初都係欣賞佢對電影嘅全程投入，大家公私分明嘅。」
文：影視組