阿嬌自動波造B 唔使金豬催生

阿嬌昨日身穿藍色背心長裙、外披皮褸出席活動，被指人逢喜事精神爽，她笑言因之後要到內地拍戲幾個月，故最近每日敷Mask！問到婚禮籌備進展，她表示仍未決定在哪裏影婚照，但已跟男友家長見過面：「對方家長對我印象好好，因為自己本身係一個心地善良嘅人。（有冇被人催生B？）我同英皇珠寶講咗，我阿媽嚟買金豬嗰陣，唔好賣畀佢，我唔想咁快戴金豬。（未來奶奶會送金豬畀你？）佢應該唔會，但會送家傳之寶或者珍貴嘢。（有冇諗住生豬仔？）我會生嘅，但大家要夾時間，睇緣分啦！」

唔八卦祖兒分手

問到婚後是否跟老爺奶奶同住，阿嬌說：「我同老公成日周圍飛，所以唔會Stay喺一度。」二人正在台灣物色合適地方，作為新婚愛巢之用。她又表示婚後會繼續工作，做一個勤力藝人。此外，問到好姊妹容祖兒（Joey）與劉浩龍分手一事，阿嬌說：「最緊要係Joey開心，我哋係知心朋友，所以我唔會特登去八卦，佢遲吓會去歐美巡迴演唱3日。」

阿嬌與未婚夫賴弘國在台灣覓愛巢，過二人世界。	阿嬌阻止珠寶店賣「金豬」畀阿媽。	衛詩雅終於放假去旅行，開心到飛起！

衛詩雅等放假

同場的衛詩雅則興奮表示，過幾天便可以放假：「已經有一年半冇假放，本來諗住去泰國大象孤兒院做義工，因為我好鍾意動物，但Full咗Book唔到，所以轉去滑浪，亞洲區。其實幾個月前都Plan過去旅行，點知突然要做嘢，要取消所有機票酒店，成個人鬱鬱不歡，今次應該唔會去唔成啦！」首次滑浪的她笑言不會穿比堅尼，因有朋友試過滑浪時Top被沖走。

文：名人組