杜汶澤做訪問受氣（慶）爆掟咪走
向來敢言的藝人杜汶澤昨日於社交網留言透露，接受專訪時遇上不禮貌對待，自覺「無謂受氣」的他，最終除下咪高峰離開，雙方不歡而散，阿澤直言：「你鍾意點剪就點剪！我條命硬過鐵，你剪我唔死o架！」
事緣近日阿澤忙於籌備網上節目，除計劃力捧作風大膽的性感美女貝依霖任主持大膽談性外，亦接受由昔日亞視好兄弟「穿針引見」的網站記者進行錄影訪問，可惜訪問期間出現語氣及溝通問題，令阿澤忍無可忍，開始未夠20分鐘，即主動中斷訪問。事後他更於社交網「洩憤」留言：「我老喇，唔會畀自己再受呢啲閒氣……我肯畀你訪問，你又句句窒頭窒勢，語氣又差……過程中我已經盡量忍讓……你咁嘴Gel Gel做乜啫？有乜好處吖？……」
記者與阿澤取得聯絡，心情已平復的他坦言：「個女記者嚟到好似搵交鬧咁，態度同訓導主任教訓學生，又或者警察同人落口供冇乜分別。上次（指電台訪問鬧不快）我都未至於咁，今次真係我入行25年嚟，第一次掟咪走人呀！」阿澤再打趣說：「以前我唔明有啲公園阿伯點解唔同陌生人傾偈，依家我就係公園阿伯嘞，應該考慮唔再同唔識嘅人做訪問，識得耐嘅（記者）大家明嘅。」