BB工廠光榮結業！謝安琪宣布封肚
謝安琪昨日踢爆老公張繼聰平時只是認叻，吹噓自己很重要，實質在家冇地位！現年41歲的她又宣布「封肚」，笑稱「BB工廠」光榮結業：「其實呢個年紀都冇o架啦！」
天后謝安琪（Kay）昨日出席兒童藝術活動，與小朋友用玩具車的車轆繪畫。提到囡囡張靖快將一歲生日，她表示囡囡湊得比想像中輕鬆，故這一年全職湊女都不算捱到很殘。講到老公張繼聰經常指囡囡黐他，Kay卻大爆：「其實個女好黐我，個仔都係黐我多啲！」記者打趣指原來阿聰平時只是「認叻」，Kay即笑老公玩語言「偽」術：「最高境界就係自己呃到自己，佢好少喺屋企，佢喺屋企地位無謂講，但我哋好欣賞佢辛勤工作。」又笑指老公吹噓到自己在家很重要，是想彌補心靈空虛，Kay這番「明踩暗閃」的說話，搞笑得來勁Sweet！
問到可打算追多個？Kay坦言很難，覺得現時已經足夠，與小朋友相處重質不重量。她又大爆囝囝張瞻很喜歡BB：「佢直頭想我好似工廠咁生好多，因為佢唔知道湊嘅過程。」
人生下半場拚事業
而阿聰亦不想Kay繼續做「BB工廠」，因為知道女人生小朋友要經歷很多事，故宣布「BB工廠」要榮休：「其實呢個年紀都冇o架啦，光榮結業！我依家41歲，下半場啱啱開始，做媽媽都算得心應手，但事業方面就想試多啲。」
文：音樂組
攝：唐豁莊